សម្តេចតេជោ ហ៊ុន សែន ជំរុញឱ្យក្រសួងសាធារណការ ពិនិត្យកំណត់បន្ថែមល្បឿនដល់១០០គីឡូម៉ែត្រក្នុងមួយម៉ោងនៅលើផ្លូវជាតិលេខ៣
Facebook
Telegram
Twitter
Linkedin
តាកែវ៖ ក្នុងពិធីសម្ពោធដាក់ឱ្យប្រើប្រាស់ ជាផ្លូវការនូវកំណាត់ផ្លូវជាតិលេខ៣ ពី ភ្នំពេញ-កំពត ប្រវែងជាង ១៣៤គីឡូម៉ែត្រ នៅថ្ងៃទី២ ខែមីនា ឆ្នាំ២០២២នេះ សម្តេចតេជោ បានស្នើឱ្យក្រសួងសាធារណការ និងដឹកជញ្ជូន គួរពិនិត្យ ក្នុងការកំណត់បន្ថែមល្បឿនបើកបរដល់១០០គីឡូម៉ែត្រ ក្នុងមួយម៉ោង នៅតាមជាតិលេខបី និងផ្លូវទាំងឡាយណាដែលមានទំហំធំៗបែបនេះ។
សម្តេចតេជោបន្តថា កំណាត់ផ្លូវជាតិលេខ៣នេះ ក៏អាចរាប់ជាប្រភេទផ្លូវល្បឿនលឿនផងដែរ ព្រោះផ្លូវនេះគឺមានទទឹងផ្លូវធំទូលាយ ងាយស្រួលក្នុងការធ្វើដំណើរ។
ជាមួយគ្នានេះ សម្តេចតេជោ ក៏បានកោតសរសើរពីការរៀបចំដាក់កាមេរាចាប់ល្បឿនលើកំណាត់ផ្លូវជាតិលេខ៣នេះ ដែលសម្តេចចាត់ទុកថានេះជាការធ្វើទំនើបកម្មមួយនៃការសាងសង់ផ្លូវនៅកម្ពុជា។
សម្តេចបានមានប្រសាសន៍បន្តថា កំណាត់ផ្លូវជាតិលេខ៣ គឺជាខ្សែផ្លូវដ៏សំខាន់មួយសម្រាប់ការធ្វើដំណើររបស់ប្រជាពលរដ្ឋ និងការដឹកជញ្ជូនទំនិញរវាងរាជធានីភ្នំពេញ ទៅខេត្តកំពត កែប និងឆ្ពោះទៅកាន់ខេត្តព្រះសីហនុផងដែរ។ មួយផ្នែកនៃកំណាត់ផ្លូវនេះ ក៏បានបម្រើដល់ការធ្វើដំណើរ និងដឹកជញ្ជូនទំនិញនៅក្នុងខេត្តកណ្តាល កំពង់ស្ពឺ និងតាកែវផងដែរ។
ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានមានប្រសាសន៍ថា កំណាត់ផ្លូវជាតិលេខ៣ ចាប់ពីចោមចៅ ទៅដល់ក្រុងកំពត ត្រូវបានស្តារម្តងរួចមកហើយនៅឆ្នាំ២០០៨-២០១១។ប៉ុន្តែដោយសង្កេតឃើញថាកំណើនចរាចរណ៍មានការកើនឡើង គួរឱ្យកត់សម្គាល់រាជរដ្ឋាភិបាលបានសម្រេចអនុញ្ញាតឱ្យធ្វើការពង្រីកកំណាត់ផ្លូវនេះចាប់ពីចោមចៅដល់បែកគូស ប្រវែងជិត ៧០គីឡូម៉ែត្រ ជាបួនគន្លង និងកំណាត់ផ្លូវពីបែកគូសដល់ក្រុងកំពតប្រវែងជិត ៦៥គីម៉ែត្រ ជាពីរគន្លង ដោយក្រាលបេតុងកៅស៊ូAC ឡើងវិញ។
កំណាត់ផ្លូវនេះ ឆ្លងកាត់រាជធានីភ្នំពេញ ប្រវែង ១២គីឡូម៉ែត្រ, ខេត្តកណ្តាល ប្រវែង ១១គីឡូម៉ែត្រ, ខេត្តកំពង់ស្ពឺប្រវែង ៣០គីឡូម៉ែត្រ, ខេត្តតាកែវប្រវែង ៣០គីឡូម៉ែត្រ និងខេត្តកំពតប្រវែង ៥១គីឡូម៉ែត្រ។ កំណាត់ផ្លូវនេះបានសាងសង់ ស្ពានថ្មី ចំនួន ១១កន្លែងប្រវែងសរុប ៤៤៣ម៉ែត្រ ទទឹង ១២ម៉ែត្រ និងពង្រីកស្ពានចាស់ ២កន្លែងប្រវែងសរុប ៣០ម៉ែត្រ។ កំណាត់ផ្លូវនេះ បានសាងសង់លូជ្រុងចំនួន ៣៤កន្លែង លូមូលចំនួន ១៧៧កន្លែង លូដាក់តាមប្រឡាយសងខាងផ្លូវចំនួន ២៧១កន្លែង និងការងារបំពាក់បរិក្ខារផ្លូវថ្នល់ រួមមាន៖ ផ្លាកសញ្ញាចរាចរណ៍ គំនូសចរាចរណ៍ បង្គោលគីឡូម៉ែត្រ និងបង្គោលសុវត្ថិភាពព្រមទាំងមានបំពាក់កាំមេរ៉ាចាប់ល្បឿនអចល័តចំនួន១០កន្លែងនិងសាងសង់ស្ពានថ្មើរជើងរំលងផ្លូវចំនួនពីរកន្លែងផងដែរ។
ឯកត្តមបន្តថា កំណាត់ផ្លូវជាតិលេខ៣ ភ្នំពេញ-កំពត គឺជាខ្សែផ្លូវនៃប៉ូលសេដ្ឋកិច្ចនិងទេសចរណ៍ ដ៏មានសក្តានុពលរបស់កម្ពុជាឆ្លងកាត់រាជធានី-ខេត្តចំនួន៥ រួមមាន៖ រាជធានីភ្នំពេញ ខេត្តកណ្តាល ខេត្តកំពង់ស្ពឺ ខេត្តតាកែវ ខេត្តកំពត និងតភ្ជាប់ទៅកាន់កំពង់ផែសមុទ្រអន្តរជាតិខេត្តព្រះសីហនុតាមរយៈកំណាត់ផ្លូវជាតិ លេខ៣(កំពត-វាលរេញ) ភ្ជាប់ទៅផ្លូវជាតិលេខ៤ (ព្រៃនប់) និងតភ្ជាប់ទៅច្រកព្រំដែនកម្ពុជា-ថៃ ខេត្តកោះកុងតាមផ្លូវជាតិ លេខ៤ និងផ្លូវជាតិលេខ៤៨។ កំណាត់ផ្លូវជាតិលេខ៣ក៏ជាផ្នែកមួយនៃច្រករបៀងប៉ែកខាងត្បូងតាមមាត់ សមុទ្រ នៃមហាអនុតំបន់មេគង្គ តភ្ជាប់ផ្លូវអាស៊ានហាយវ៉េយលេខ១២៣(AH-123) ពីប្រទេសថៃ មកប្រទេសកម្ពុជា តាមរយៈផ្លូវជាតិលេខ៤៨ ហើយឆ្លងកាត់ផ្លូវជាតិលេខ៤ ត្រង់ចំការលួង ផ្លូវជាតិលេខ៣ ត្រង់ចំណុចផ្លូវបំបែកវាលរេញ និងបន្តទៅប្រទេសវៀតណាម តាមរយៈផ្លូវជាតិលេខ៣៣ កាត់តាមកំពង់ត្រាច ចេញទៅច្រកព្រំដែនកម្ពុជា-វៀតណាម ព្រែកចាក (កំពត)-សាសៀរ (ហាទៀង) ដែលនឹងជួយជំរុញកំណើននៃទំហំពាណិជ្ជកម្ម និងទេសចរណ៍ រវាងកម្ពុជាជាមួយប្រទេសជិតខាង៕
