ភ្ញៀវទេសចរជាង១៧ម៉ឺននាក់ចេញដើរកម្សាន្ត នៅចុងសប្តាហ៍ទី៤ ខែវិច្ឆិកា

---

ថ្ងៃទី២៧-២៨ ខែវិច្ឆិកា ឆ្នាំ២០២១ ដែលជាថ្ងៃចុងសប្ដាហ៍ទី៤នៃខែវិច្ឆិកា នៅទូទាំងប្រទេសកម្ពុជាទទួលបានភ្ញៀវ ចំនួន១៧២,៩៧៦ នាក់ ក្នុងនោះភ្ញៀវជាតិ ១៦៧,៥៤៩នាក់ និងភ្ញៀវបរទេសផ្ទៃក្នុង ៥,៤២៧ នាក់។ នេះបើតាមឯកឧត្តម ថោង ខុន រដ្ឋមន្រ្តីក្រសួងទេសចរណ៍។

គោលដៅទេសចរណ៍សំខាន់ៗ រួមមាន៖

* ខេត្តព្រះសីហនុ ៣១,១១៨ នាក់

* រាជធានីភ្នំពេញ ២៨,៨៤៩ នាក់

* ខេត្តកំពត ២២,៦៤៩ នាក់

* ខេត្តពោធិ៍សាត់ ១៤,៨៦១ នាក់

* ខេត្តសៀមរាប ១១,១២៣ នាក់

* ខេត្តបាត់ដំបង ១១,០៧៤ នាក់

* ខេត្តកែប ៨,៥៨១ នាក់។

ឯកឧត្តម ថោង ខុន បានឱ្យដឹងថា តាមតួលេខខាងលើ ទោះបីពុំមានថ្ងៃឈប់សម្រាកជាបុណ្យជាតិ ប៉ុន្តែចរន្តភ្ញៀវទេសចរផ្ទៃក្នុងនៅតែមានភាពសកម្មនៅរៀងរាល់ចុងសប្តាហ៍។

 ចំពោះការទប់ស្កាត់ការរីករាលដាលជំងឺកូវីដ-១៩ សង្កេតឃើញជារួមថា ទាំងម្ចាស់មូលដ្ឋានអាជីវកម្ម និងភ្ញៀវទេសចរមានការយល់ដឹងកាន់តែប្រសើរ និងបានចូលរួមអនុវត្តវិធានការនានាកាន់តែសកម្ម ពិសេសវិធានការ «៣កុំ និង ៣ការពារ» ស្របពេលដែលរដ្ឋបាលរាជធានី-ខេត្ត មន្ទីរទេសចរណ៍បានបន្តជំរុញការអនុវត្តវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា (SOP) ឲ្យបានគ្រប់មូលដ្ឋានអាជីវកម្ម៕