ទាហានថៃ បានឃាត់ខ្លួនពលករខ្មែរ ១០នាក់ និងជនជាតិថៃ ០៥នាក់ ឆ្លងដែនខុសច្បាប់
Facebook
Telegram
Twitter
Linkedin
បន្ទាយមានជ័យ៖ កម្លាំងយោធាថៃអង្គភាពទី១២ ឈរជើងតាមបន្ទាត់ព្រំដែន ក្នុងស្រុកតាប្រាយ៉ា ខេត្តស្រះកែវ ប្រទេសថៃ ជាប់ព្រំដែន ទល់មុខនឹងស្រុកថ្មពួក ខេត្តបន្ទាយមានជ័យ របស់ប្រទេសកម្ពុជា ចុះល្បាត ក្នុងភូមិសាស្ត្រ ទទួលខុសត្រូវ នៅថ្ងៃទី២៧ ខែធ្នូ ឆ្នាំ២០២១ បានប្រទះឃើញពលរដ្ឋ ខ្មែរ ចំនួន១០នាក់ (ស្រី០៤នាក់) នៅបរិវេណភូមិទ័ពសៀម ឃុំ-ស្រុកតាប្រាយ៉ា ខេត្តស្រះកែវ បានលួចឆ្លងដែន ចូលប្រទេសថៃ តាមច្រករបៀង ដោយខុសច្បាប់ ដែលប្រថុយនឹងគ្រោះថ្នាក់ដល់អាយុជីវិត។
ពលរដ្ឋខ្មែរទាំង ១០នាក់នេះ បានប្រាប់ថា គាត់ធ្វើដំណើរមកពីខេត្តកំពង់ចាម និងកំពង់ធំ ប្រទេសកម្ពុជា មានគោលបំណង ធ្វើដំណើរទៅធ្វើការ នៅក្នុងខេត្តប៉ះធំថានី (បថមធានី) និងខេត្តស្រះកែវ របស់ថៃ ទើបសមត្ថកិច្ចថៃ ឃុំខ្លួន យកទៅសួរនាំបន្ថែម និងបញ្ជូនទៅឲ្យជំនាញ ស្រុកតាប្រាយ៉ា ដើម្បីចាត់ការ តាមច្បាប់បន្ត។
ជាមួយគ្នានេះដែរ កម្លាំងទាហាន អង្គភាពទី១៣ ប្រចាំស្រុកអារញ្ញ កងកម្លាំងបូរផា បានចេញល្បាត ឃ្លាំមើល និង ត្រួតពិនិត្យតំបន់ ដែលទទួលខុសត្រូវនេះផងដែរ ក៏បានប្រទះឃើញ បុរសជនជាតិថៃ កំពុងលួចឆ្លងដែន តាមច្រករបៀង ធ្វើដំណើរចូលទៅទឹកដីកម្ពុជា ចំនួន០៥នាក់ នៅបរិវេណភូមិខ្លងលឹក ឃុំ-ស្រុកអារញ្ញ ខេត្តស្រះកែវ។
ក្រោយពីបានសួរនាំរួចសមត្ថកិច្ច បានឲ្យដឹងថា បុរសជនជាតិថៃ ទាំង០៥នាក់ ធ្វើដំណើរមកពី ទីក្រុងបាងកក មានបំណងធ្វើដំណើរ មកធ្វើការនៅក្នុងទឹកដី ខេត្តបន្ទាយមានជ័យ របស់កម្ពុជា ទើបសមត្ថកិច្ចថៃ ឃាត់ខ្លួនបញ្ជូនទៅឲ្យជំនាញ សមត្ថកិច្ចស្រុកខ្លងលឹក ដើម្បីចាត់ការ តាមច្បាប់បន្ត៕
